| lyric | 1. Wenns nur no Pizza git und nie meh Cervelat,
wenn d nur Martini Dry aber kei Moscht chasch ha.
Es hät im chlinschte Dorf en English Pub bereits,
warum häts nienet e rächti Beiz?
Und wenn de Radio keis dütsches Lied meh spillt,
wenn nur no Englisch chunt, Stund für Stund, s macht di wild.
Wee d fremdi Sprache ghörsch, ganz glich wo d häregasch
und wenn d vo all dem keis Wort verschtasch.
Reg.: Das chunnt eus spanisch vor,
das chunnt eus gopferteckel spanisch vor.
Mir bruched gopfreidstutz ne dständig öppis Neus,
mir sind doch nöd in Spanie, mir sind doch da bi eus.
2. Wenn jede Johnny heisst und keine heisst meh Hans,
en Huufe Jimmy gits, nume Fritz heisst kein Schwanz.
Es git kei Buebe meh, es git nur no en Boy,
s isch alles anders, s isch alles neu.
Sogar der Wilhelm Tell heisst sicher nächschtens Bill
und jede Würschtlistand i dem Land heisst jetz Grill.
E neui Disco chasch a jedem Egge gseh,
nume go tanze chasch niene meh. |