| lyric | Es ist scho wider erste Mai,
Und d’Ankebluemetöieli
Trait’s über d’Matte us und Rai.
All Gasse sind voll Chindegschrei;
Und Fyrtig isches überei.
D’Lüt glaubed an ne bessri Zyt.
Si gsehnd’s a jedrem Vyäli.
Si syged, säged’s, blöier hüt.
Au gsäch me hür wie nie se wyt.
D’Wält lueg eim a wie Ankebrüt.
Au mir ist ’s Läbe nüd vertleidt.
I true jedrem Zeijeli
Wo üppis vo Grotwätter sait.
J glaube au, ’s wärd guet ustrait,
Was hür dr Mai i d’Eili leit.
Sött einiwäg äs Näst vorcho,
Wo’s dinne hät Nachthüeli,
Se wemmer s’ au am Läbe lo.
Die gäligst Sunne luf eim no,
Gäb’s nüd au Schatte neimewo. |