| lyric | Es dunkt mi, es sunni
Ä Lengeri meh.
Es hätt scho blo Schatte
Und Schnürpfli im Schnee.
Sä wird’s is glylachtig
Au Tauwätter gä,
Und chuumlicher Zyte
Für d’Lüt und für d’Chräh.
Jä, Lanzig ist Lanzig,
Das ist einist wohr.
D’Wält chunt eim halt währli
Glych heiterer vor.
’s Veh fot afo bägge
Im Stall no dr Alp.
Dr ulydigst Müchi
Taut uf und macht’s Chalb.
Und ’s Wybervolch, ’s ledig,
Tuet ’s Pfeisterli uf.
Gwüß, Bethli, hür chunt er
Durs Steiwägli uf!
Jä, bruchst do nüd z’räuke.
Es ist mer jo scho,
I gsäch i dym Äugli
Äs Wiegeli goh.
Henuse, es beßred.
Es hät’s mit em Schnee.
Wend hür wider einist
Rächts Heuwätter gseh.
Au stoßed mer wider
Alt Hoffnige uf.
Hür stelli s’ nu einist
Wie ’s Chegelris uf.
Bi jeddwedre Lanzig
Sä jung und sä dumm.
Chunt’s ächt wider z’dundre,
Und chegled mer s’ um? |