| lyric | dr her zehnder, wo vor sich
e tasse tee het uf sym tisch
tuet drin rüere mit em löffel
wo im untertassli isch
dass dr Zucker guet vergeit
tuet er rüere drin und är
füert dr löffel zringsetum
und zletscht no einisch hin und här
aber ds letzschte hätt er besser
unterla, jitz macht dr tee
nämlech wälle, schüttet us
im untertassli git’s e see
dr her zehnder, wo das gseht
lüpft sys tassli, de wott är
ds untertassli drunder wäggnäh
dass er’s zrügg ids tassli läär
doch am tassli chläbt e tropfe
är nimmt ds untertassli wägg
und jitz flügt dr tropfen abe
uf em tischtuech git’s e fläck
dr her zehnder gseht dr fläcke
uf em tischtuech juschtamänt
won er ds untertassli heltet
und wil är i däm momänt
uf e tisch anstatt uf ds tassli
luegt, so schüttet är dr tee
statt i ds tassli zrügg drnäbe
s’git e grosse fläcke meh
und chuum het er die bescherig
won er agstellt het, erkannt
ds untertassli i dr lingge
ds tassli i dr rächte hand
da erschlüpft er so dass ds tassli
wo dr tee no drinnen isch
ou no usläärt und jitz isch
die ganzi schwetti uf em tisch
ds unglück spilt i syr verchettig
em her zehnder übel mit —
aber öich cha’s schliesslech glych sy
we’s bi zehnders fläcke git |